11月2日朋友「舌」終於出嫁喇~! 真係恭喜佢榮升靚太行列 ^~^，今日(11月4日)亦已經回門派燒豬去了~哈哈!
講起當日除新郎新娘，及其家人要早起之外，相信我都係最早起的其中一個， 因為當日我負責制作花球&交收，所以4am已經起身做準備，交收後，6:30am去酒店會合新娘，去到酒店姊妹團的其中幾位都依然係睡夢之中，真係打擾晒。
說實在11月1日及2日的天公做美，"小舌"擔心的落雨天完全無出現過，真係一位貴人呀 ^~^。可惜對花來講就太熱了，鮮花買回來之後，大家一直擔心會謝，所以我特地為佢開咗個冷氣房，並加入保鮮劑，保持其新鮮，身處冷氣房中花都會比較耐放，不過其實亦有其弊處，就係一接觸到熱氣，有機會加速其凋謝。
我可以話放到最後一刻，先將花由冷氣房中取出，用盛有保鮮劑的玻璃紙包裹底部，使其能持續吸水，減少脫水凋謝的情況，可惜天氣著實太熱，不出30min已經見到花開始出現輕微的狀況，問題算不大，不過之後發生的就大問題了… …我做的花球是可以隨時吸水的手束花，一般來講供給水用的玻璃紙，係接新娘的時候就會除去的，之後準備好一瓶加有保鮮劑的水，可以比d花慢慢享用，我亦在之前提醒過新人呢個問題，可惜當日d兄弟竟然同我講，話我用玻璃紙封底就咁梱住，怕會滴水唔穩陣，所以就用佢地另外買的車門花膠絲帶梱實成個花徑，聽罷我只有愕然，因為未見實物我心想應該可以拆下來的，點知一睇…整個花壓在一起，在外部的花已有折斷的跡象，我心裡只有概嘆，"小舌"一直期待的花球走樣了…已經不能還原喇……，我知道我不能多說話，花係佢地的，要變成如何，我唔可以多說，不過眼見自己的作品變成這樣…心裡面多少會有點那個，我想每一件事都幫佢做到最好，可惜卻失敗，感覺自己好內疚，好似破壞咗人地的好事一樣……唉~!幸好一切還是順利進行 ^~^
不過呢個都只係我第一件震驚的事，來緊的更令我意外，我製作的車頭花飾，放置在我家中將近一個月，我多次取出修改調整，到最後檢查，從不有缺損的情況出現，不過當日我意外得知，花飾分家了，有兄弟向我講，蝴蝶整個鬆脫出來，用以吸索車身的部份固定唔到，我一摸車身無抺過，所以係唔光滑的情況下吸索吸不了，兄弟解釋車身太熱所以唔得…是有可能，不過吸索本身為此專為車身而設，理論上可能性好細，而且在此之前已測試過，所以可能性就更少了…車花如何脫落我睇唔到，因為又被一大堆膠絲帶梱住了，不過可以完好使用我已覺得萬幸，不過我真係唔明點解可以整到如此地步，不要去追究了，最重要係順利完成過程，就算大家覺得係我的問題，我亦會接受的，免得大家再去追究令新人唔愉快，而且我亦唔能夠排除我的責任，所以將那些不快都給我吧! ^_^
"小舌"的婚禮之後依然有出現錯漏，令佢的心情多少受到影響，其實每一個婚禮多少都會係咁，想要一個完美無缺的婚禮，其實並唔容易，不過大家卻可以盡善盡美，安排完善，有良好的溝通配合同管理系統，再加上妥善自律的人手，相信會大大減低問題的發生，就算發生了問題，亦不要太記掛，令自己加倍緊張，影響心情，因為一定會有解決的辦法，新郎同新娘只要盡量做好自己便可以了，其他的事就由親友去處理就好，雖然講好容易，不過係真實環境下仲係會多少令人心煩的，呢個時候就盡量放鬆吧~!
"小舌"的婚禮總算順利完成，同大多數新人一樣，婚禮完結之後，大家都會諗婚禮是否順利完美，會唔會得失來賓，不過我可以同大家講一句老實說話，一件事要去滿足所有人的要求喜好是無可能的，要知道人人的觀點態度都不同，新人最重要是要令自己覺得舒坦高興，當然有不得不介入的時候，但亦要以平常心去對待，不要過於思考，令自己苦惱，婚禮完成後，已是一個既定事實，多想亦不會改變，所以就不要回首太多了，因為每一個婚禮都是一個幸福歡喜的回憶，相信大家都會有同樣的感受的，這樣就已經係一個最好的結果了 ^~^
So "小舌"你就不要想太多了，亦不要去懷疑，大家都會為你的婚事而感到恩喜的 ^^
留言列表
手工皂 (5)
