Chatté Handmade 手作りの部屋

我寫咗一大堆之後大家不妨睇下Joy寫下的親切記述^^

相片因為係拍下後共同使用，所以會有同我一樣的相，同我未有放上來的相，不過我自己比較喜歡Joy的描述，睇得好舒服 ^~^

廣州<儘興>之旅

上個星期六，和亞Kay約好上廣州，出發前很擔心天氣，既怕會有暴雨，又怕出太陽會很曬，結果天公很做美，雖然是下雨天，但最大雨的時候，我們就身在由深圳開往廣州的火車「和諧號」上

～～有相為證架！睇下，真係倒瀉水咁架～～

就到廣州東站時，廣播話要回收車票，我哋即刻影返張相留下紀念先，
但結果．．．．呃人既，都冇人問收返！

雖然幾個月前都嚟過廣州，但由於我失憶得太嚴重，好多嘢都唔記得，結果同亞Kay兩個大鄉裡笑料百出，自己都幾乎笑死自己！hahaha ))))))
俾大家見識下廣州既地鐵飛～～冇錯，就好似籌碼咁既，要袋穏先得！

之後我哋就係婚紗街一路行，都有少少收穫既，海珠廣場因為裝修，所以我哋逗留咗好短時間就走啦！
中間發生咗段小插曲，就係我因為電話轉咗台，到咗深圳先發現冇漫遊，講好咗自己行完就會打俾我係廣州個好朋友~A Lon, 搵唔到佢唔得架～佢話請我食飯架嘛！哈哈～～～
我哋幾經辛苦搵到個電話亭，但發現唔可以用硬幣，只可以用IC卡．．．咩嚟架？？好彩係電話亭隔離有個士多有收費電話可以用～～都話個天錫住我架啦！
約好A-LON係宜安廣場門口等，明明佢話即刻到架，點解我哋等咗半個鐘都唔見佢架？？？終於好聰明咁走去問保安，先知呢個商場有東，南，西，北４個出口咁多～～使唔使呀！結果當然A-LON都等咗我半個啦，真係唔好意思呀！

介紹下２位猛男先，右邊戴帽既就係我好好既朋友A LON，A LON 係好罕有既朝鮮族人，話佢係中國人，不如話佢係韓國人，因為佢韓文比中文仲流利，身邊大部份朋友同客人都係韓國人。
左邊呢個就係佢個朋友，冇錯啦，係一位韓國人，但係～佢講得一口既流利又地道既普通話！

搵到A LON，當然有好嘢食啦，大哥車我去咗廣州既Korean Town食呢間出名既『大長今』～就係我同Kay興致勃勃咁影相既時候，侍應小姐好禮貌咁同我哋講話唔俾影佢哋地方，影自己就得喎～～好彩手快影咗啫！

上面抽煙呢舊嘢好勁～成間餐廳都冇油煙味，即使A LON 同大哥係對面食煙，我哋都完全聞唔到煙味～正！

泡菜薄餅～辣得嚟又好好味！

碳燒鰻魚～好香呀～～！！

見到桶生菜葉嗎？原來正統韓國燒牛肉係要用生菜包住嚟食架！

第一次飲「真露」，原來咁好味架喎～甜甜哋！

大哥特登出去拎俾我哋既甜品～南瓜粥，好香南瓜味，又唔太甜，開正我嗰範呀！幾想我都有兩個胃呀～～

之前A LON 就話過俾我知，韓國人習慣一晚飲幾場，所以食完大長今之後，大哥又車咗我哋去另一間餐廳。係白雲區一間韓國PIZZA店

裝潢好舒服～有家的感覺（＜－－呢句唔該用國語講呀！）

我同Kay都好中意呢個位，好似屋企飯廳！

介紹下個Pizza先，好正統既意大利做法，派底好薄好脆，面頭係海鮮＋波羅＋青紅椒絲同芝士，恰到好處～～結果，我雖然已經好飽，但都忍唔住食咗兩件！
大家見到總共６件pizza，大哥好有風度咁俾咗我同Kay每人２件，結果佢食完自己嗰件，就去搶A LON 既食!

水果沙律又靚又新鮮～～碟花生都勁好味架，我食到停唔到口添！

大哥極力推介的生啤，真係幾好飲，一Ｄ都唔苦！
（唔好俾個杯呃到，唔係Asahi）

呢個時候既A LON 其實已經處於半昏迷狀態，事關冇幾耐之後佢上到車已經不省人事，好彩有大哥車我哋去搭火車啫！
其實佢酒量好好，之後佢話俾我知原來嗰日唔記得食LUNCH，空肚飲酒所以．．．．．．

後記：從來沒有想過這次的廣州之旅可以如此儘興，如此滿足！真的很感謝你～A LON! 能有你這個朋友是我的福氣（唔知我哋前世嗌過幾多場交先造就今世的友誼呢？？？）
有人說：為你的難過而開心的人，是你的敵人；為你的開心而開心的人，是你的朋友；為你的難過而難過的人，你應該將他放在心裡面！
A LON 就是我要放他在心裡的人，我知道曾經在我最絶望最傷心的時候，他為我心痛難過！I love you too, my friend !